Mescciûa

Tànte vòtte s'atrêuva de poêxîe in zenéize, unn-a chi, unn-a la, magâra firmæ co-in nomiâgio, e che l'é 'n pecòu no métte in sciâ Ræ. Pe quésto ò 'nbastîo sta pàgina.

• Vèrsci àrabi... in zenéize
  'Na coiôza poêxîa do Nicolìn Baçigalô scrîta in arabo-zenéize sciortîa in sce il Giornale de l'11 de frevâ do 2010
• O Giâsemìn
  Rìmme do Loìggi Feràndo, dîto "o gi-go-tâ", coltô do zenéize, visciûo a cavàllo tra l'800 e o 900. O viâgio da Livelòu a Zêna do Giâsemìn o l'é stæto scrîto, ciù ò mêno, inti prìmmi dötréi ànni do 1900. A trascriçión da 'n manoscrîto o l'à fæta o Sàndro Patrón, into rispètto da parlâ originâle. Sàndro Patrón o l'à ascì curòu 'na nòtta in sce l'òutô Loìggi Feràndo.
• A mêzanéutte in pónto
  Sta filastròcca chi me-a cantâvan quànde êa picinétto; mi, che savéiva parlâ a îsa a îsa, a ripetéiva inte 'n mòddo tùtto mæ.
• Corî corî zoenòtti
  Quésta poêxîa a l'é sciortîa, no sò in sce quæ giornâle, quànde i Bìtle (The Baetles) àn tegnûo o seu conçèrto a Zêna. L'êa o 26 de zùgno do 1965 e mi, abarlugòu de liätri cómme o loâso do mangiâ, no sôlo so-anæto a sentîli, ma ò ànche conservòu i retàggi di giornâli che ne parlâvan. E tra i retàggi gh'êa quésta poêxîa.
• Radiotelefonîa
  Quésta poêxîa, in pö de manêa ma co-o rìtmo de 'n vèrso spedîo, a l'é stæta publicâ in sce 'n vêgio Boletìn da Conpàgna: o nùmero 3 de l'ànno I sciortîo de zùgno do 1928. A da 'n'idêa de cómme a l'êa vìsta quélla novitæ ch'a l'êa a ràdio. No scordémose che a prìmma trasmisción a vêgne datâ a-i 24 de dexénbre do 1906 pe òpera do Reginal Fessenden, ma-a prìmma staçión ràdio co-ê trasmiscioìn pe-o pùblico a l'é do 1919, pe òpera de 'n inzegnê da Westinghouse.
• Elögio de 'n amîgo
  'N amîgo o m'à mandòu 'na conesción a sta poêxîa: lezéila: a l’é coiôza! E se gh’éi quàrche indicaçión de ciù fæmela savéi!
• L'artâ di Apòstoli in Sàn Loénso
  Sta poêxîa chi pâ ch'o l'àgge scovèrta o Miscôxi (Giulio Miscosi), no sò dî inte quæ papelìtti. A l'é coiôza e vâ-a pénn-a de lêzila. E nòtte són do mæximo Miscôxi do quæ métto in sciâ Ræ ànche a seu prezentaçión: A capélla di Çìbbo into Dòmmo de Sàn Loénso.