Unn-a porsiõn de raviêu

O v'è piaxùo o menestron de l'âtra votta? Aöa gh'avieiva chì pronto unn-a bella porzion de raviêu, ma se arrissê o naso pensando che ô bilancio mensile o ne sciortieiva mâ buscôu, ve sbagliê de grosso. Mì penso ä dreitûa che seggian economici, perchè fòscia ve fan risparmiâ a pittansa.

Preparê unn-a bella sfêuggia un pô sottî, impastando faenn-a, euve e un pô de laete. Intanto prepariei questo pin: buraxe o giae boggie, ben tritolae con un pô de pörsemmo e çiôula, che faiei passâ con do bîttiro e sâ; azzunzei êuve sbattue con parmixan e mezz'etto de rechêutta a testa. Remescê tutto ben ben e s'o ve pâ ûn impasto troppo mollo gh'azzunziei quarche cûggiâ de pan grattöu.

Pronta a sfêuggia e pronto ô pin, no resta che fâ i raviêu con a raviolêa o senza, a piaximento; fâli chêuxe in te l'aegua savoïa e condîli con un bon töcco che poei fâ de carne, ma anche de tömate e lûganega.

Se quando servî in töa sta menestra no luxe i êuggi a tutti e quando l'han mangiâ no ve caccian e braççe a-o collo, no faemene unn-a côrpa, bezêugna cangiâ chêuga!

CHI S'AGGIUTTA...

Pe levâ da-e die e macce néigre de patatte e da frûta, passaghe in çimma a stessa scorsa dä parte interna.

Pe pûlî e cornixi indoê se ghe passa do spirito rettifìcôu dove gh'avièi primma misso de grosse fette de çioula. Frettâ poi cianin con pelle de daino.

UN PROVERBIO CHE Ô SERVE

O caxo o l'aggiutta chi l'è abituôu a pensâ: o pensâ o fa vedde o caxo.

E STELLE DIXAN:

Zenâ: Giôse e donne, sentimentali i ommi. Meise d'artisti e de studiôsi. 25 -12 -45 son da zogâ a o semenâio.

Frevâ: Pe chi l'è nato sotto a-i «pesci» troviâ sempre rimedio a tutti i fastidi. Figgi belli ma delicae. Attenti a-o scistema nervoso.

Marso: Donne troppo amôse e volubili in to matrimonio; ommi boin ma mai innamôe. Attenziôn a-o mâ de schenn-a.

Arvî: Novitae importanti in campo profescionâle. Bezeugna trattâ i affari solo in ti giorni pâri.

Mazzo: Tendenza a cangiâ idee. L'è necessaio rimandâ e decisiôin, specialmente quelle in campo sentimentale. I ommi de media etae saian particolarmente in ti pastiççi.

Zûgno: Ostacoli in famiggia pe-i nasciui in ti primmi dexe giorni. Nostalgie e deluxiôin pe quelli da segonda decade. Feliçi in ta vitta intima i nasciui verso a fin do meize.

Lûggio: Çerche de scartâ e brutte abitudini e lasciaeve guidâ da-a vostra stella. Trattae senza puîa i vostri affari che a fortunn-a a no v'abbandoniâ.

Agosto: S'allentan e preoccupaziôin e o riposo o ve scistemiâ o fìxico. Contrasti con parenti. Soddisfaziôin in amô.

Settembre: Cangiamenti in ta vostra famiggia. Matrimonio in vista. Successo in affari. Pericolo de mâ de stêumago.

Ottobre: Tradimenti de amixi pe questiôin d'interesse. Ostacoli da superâ con poscibilitae de carriera. Se parla de unn'ereditae.

Novembre: L'è mêgio no strenze ligammi. Dispiaxei intimi pe cose de nisciunn-a importanza. Posta dall'estero con unn-a bella notizia.

Dixembre: Tanto travaggio e poca soddìsfaziôn. Ma pe chi l'è nasciûo in ta primma chinzenn'a ghe saiâ un segûo miglioramento in famiggia. Pe-i atri tempo perso. Tentativo a-o zêugo e qualche vincita da poco.

RITORNO

Comme t'ê sempre bella, vêgia Zena!
Mì, figgêu, t'ho lasciôu, senza scordâte.
Poi son tornôu, ciù pe unn-a gîta amèna
che pe ô bezêugno mae de ritrovâte.
     Coscì ho credûo, coscì mì me son dîto;
     ma quando in sciä mae taera son chinôu,
     ho capîo questa gita: o l'èa o tò invîto
     e o chêu o s'è faeto strèito, ammagonôu.
Me son assettôu in sce 'n schêuggio, a Boccadâze,
ho visto tanta gente passeggiâ,
l'urtimo sô o tinzeiva comme braxe
lazzù, finn-a â Lanterna, tutto o mâ.
     Poi, cian cianin, mì n'ho ciù visto ninte,
     sentîvo e onde franzise a-i mae pê:
     due stisse, senza luxe e sensa tinte,
     crôvivan i mae euggi abbarlughê.

LUISA CASTAGNA

[ Inderrê ]