Travagiâ in ta Repubblica de Zena

E tanti son li Zenoexi / e per lo mondo sì desteixi / che und'eli van o stan /
un'atra Zenoa ge fan. Ste rimme o e scriveiva verso a fin do milleduxento l'Anonimo Zeneise, Luchetto, comme lê o diva de ciamâse. E ste paròlle ne mostran che za aloa i Zeneixi se davan da fâ a Zena e pe-o mondo travagiando e inventandose i travaggi. E òu favan in te tutti i mòddi! O bonægia o l'ea un òmmo libero, ma sensa palanche, ch'o se fava ligâ a-o remmo comme un galiöto e, se o viagio o finiva ben, o vegniva pagòu. O viagio dòppo, o fava a mæxima cösa ma, in ciù, òua o poeiva investî i dinæ ch'o l'aiva guagnòu parteçipando comme assionista all'impreisa; coscì, se e cöse andavan pe-o verso giusto, lê o guagnava doe vòtte: comme bonægia e comme assionista.

In ti papelitti de l'antiga Repubblica gh'é memöia de n'òste o quæ o continuava a servî o vin, ma o trafegava ascì in öi e gioielli: 'na mescciua de loei.

Ma quæ ean i travaggi di zeneixi? A risposta a l'é scrita in ti nommi di caroggi de Zena. Caroggio de Veie, dove se fava e se sarsiva e veie, caroggio de Cavigee, ch'ean gròsci ciöi da deuviâse a bòrdo de nave. E pòi o caroggio da Peixe, do Ciongio, do Færo che n'arregòrdan travaggi fadigosi; o caroggio da Lesca, pe açende o feugo, quello de Fuxinn-e e quello di Stoppê, travaggio importante visto che a stoppa a serviva pe câfatâ i bastimenti. Gh'é ancon o caroggio in Onzaia, dove se onzeiva o pelamme con euio de pescio, Scoaia, dove se fava e se òrnava i scuddi, mentre, pe 'n antigo privilegio, tutti i travaggi a-o servissio do pòrto se favan a-o sestê do Meu.

Travaggi antighi, travaggi che cangian co-i tempi, mestê che cian cianin se scòrdan, che veu pròppio dî che s'allontann-an da-o cheu. Fòscia a nòstra generassion a l'é ciamâ a mantegnî vivo o regòrdo di antighi loei, de arti de 'na vòtta. E i appascionæ do zeneise se devan dâ da fâ a mantegnî viva a memöia de paròlle, paròlle antighe, di nòstri poæ. E magara deuviâle pe fa conosce che in to Mediterraneo l'American Dream, o seunno american, o se ciamava Repubblica de Zena, un pòsto dove tutti poeivan travagiâ, guagnâ, vegnî ricchi, avei a seu òccaxon.

Scignoria!
Franco Bampi

L'amolitta

Sciacchighe addòsso pe ingrandîla

[ Inderrê ]