Tegnimmo asseisa ancon questa lampetta
in sciä porta de casa,
mentre a lûxe
a sparisce, cianin, in to caroggio.
A voxe a ritorniä co-e parolle
che san d'antigo,
de saponaria e spigo
comme i freschi lenseu
che, a-o sabbo seia,
ninnavan - "... dormi ben, doman l'é fèsta..." -;
gh'ëa de scadense, comme questa, e o mondo
o l'andava a cavalli, ma segûo.

Se me despeuggio scin che resto nûo,
se pöso i mae montgomery e i mae jeans
che m'han coverto l'anima da vei,
sott'a-a pelle m'attreuvo
e parolle di nonni. Foscia sperse,
ma belle ancon; e paege a de viovette
serrae tramëzo a-e pagine de 'n libbro.

Parolle? - Scì, parolle! - Ma son quelle
che me dixeivan - "... damme man, se dunque
ciammo l'ommo do sacco". - 'Na böxìa
e, però, mi obbedivo
perché sentivo a mae inte 'n'ätra man
intrâ comme 'na barca a l'intra in porto.

Pe st'antigo parlâ, ch'o no l'é morto,
ninte requiemeterna..! Portae l'euio
pe 'na lampetta da tegnise asseisa
in sciä porta de casa:
e sciû pe-a scaa
demmose un pö de cangio, pe veggiâ.

Sandro Patrone