Lions Clubs International
[ Preghêa di Lions ]
[ I mòddi de comportâse di Lions ]
[ Scöpi do Lionismo ]
[ Misción di Lions Clubs International ]
Preghêa di Lions
Te ringraçiémmo, Segnô,
pe êse chi rionîi
pe diventâ sénpre mêgio e pe poéi
servî mêgio i nòstri fræ.
Dànne, Segnô,
l'umiltæ, a conoscénsa,
e a fòrsa ch'a sèrve pe fâ insémme
i nòstri dovéi con entuxàsmo e tenàcia.
Dànne a bontæ e a tolerànsa
pe rispetâ e òpinioìn di âtri
e alimentâ inte tùtti l'aspiraçión
a servî l'umanitæ ch'a sòffre.
Protézzi
a nòstra grànde famìggia lionìstica
ch'a travàggia ancheu, cómme sénpre,
pe-o cùlto de l'amicìçia,
de l'amô pe-o pròscimo e
do servìçio disinteresòu.
Concêdi, o Segnô,
a-i nòstri Amîxi Lions
che n'àn lasciòu,
o prémmio
da Teu lûxe
e làscia che loiâtri ne stàgan vixìn
méntre fémmo o nòstro servìçio.
Benedìsci, Segnô,
o nòstro travàggio.
I mòddi de comportâse di Lions
Dimostrâ co-a bontæ de òpere e co-o travagiâ a-a spedîa, a serietæ da vocaçión a-o servìçio.
Çercâ o sucèsso, domandâ e giùste retribuçioìn e avéi i giùsti guâgni, sénsa pregiudicâ a dignitæ e l'ònô faxéndo cöse gràmme ò che no ségian série fìnn-a in fóndo.
Aregordâse che into svòlge a pròpia ativitæ no se dêve danegiâ quélla di âtri: êse leâli con tùtti, sincêri vèrso de noiâtri.
Afrontâ co-a màscima atençión vèrso o pròscimo ògni dùbio ò pretéisa inti confrónti di âtri e, se necesâio, atrovâ a soluçión ànche cóntra o pròpio interèsse.
Consciderâ l’amicìçia cómme fìn e no cómme mézzo, bén savéndo che a vêa amicìçia a no l'exìste pe-i vantàggi ch'a peu ofrî, ma pe riconósce inti benefìççi o spìrito che i ànima.
Avéi de lóngo presénti i dovéi do çitadìn vèrso a Pàtria, o Stâto, a comunitæ inta quæ ognidùn o vîve; con lealtæ prestâghe sentiménti, òpere, travàggio, ténpo e dinæ.
Êse solidâli co-o pròscimo agiutàndo i déboli, socorìndo chi à bezéugno, avéndo rigoàrdo pe chi sòffre.
Êse ritegnûo inta crìtica, generôzo inta löde, avéndo de lóngo in cheu de costruî e no de destrûe.
Scöpi do Lionismo
Creâ e stimolâ un spìrito de comprensción tra i pòpoli do móndo.
Promêuve i prinçìppi de bón govèrno e de bónn-a çitadinànsa.
Êse de lógo interesæ a-o bén cìvico, colturâle, sociâle e morâle da comunitæ.
Unî i Cleub con i vìncoli de l'amicìçia e da recìproca comprensción.
Atrovâ 'na sêde pe poéi discùtte in mòddo lìbero e avèrto de tùtti i argoménti de interèsse pùblico, lasciàndo pèrde sôlo a polìtica de partîo e o setarìsmo religiôzo.
Incoragiâ e persónn-e che se dédican a-o "servìçio" a megioâ e seu comunitæ sénsa voéighe guagnâ adòsso e a promêuve un costànte elevaménto do livéllo de qualitæ e de serietæ morâle into comèrcio, inte l'indùstria, inte profescioìn, inti incàreghi pùblichi e into comportaménto privòu.
Misción di Lions Clubs International
"Creâ e promêuve un spìrito de comprensción
pe-i bezéugni da génte
pe mêzo de volontâri servìççi
insémme a-e comunitæ e a-a cooperaçión internaçionâle"