Marinetta
zeneise@francobampi.it
 

Ti stæ pe êse trasportòu inta pàgina nêuva
http://www.francobampi.it/zena/intra/marinetta.htm

Intrâ > Marinetta
[ Inderrê ]

Edoardo Firpo

Ä Contessa Mary Peñalver.

Marinetta, patella de scheuggio,
bagnä solo da-e sc-ciumme do mä,
rievocate anc'un pö mi te veuggio
comme t'ë ne-a memoia restä!...

Oh se alloa ti pàivi lontann-a
cö to canto do mä e de çigäe,
e o reciocco de qualche campann-a
dai olivi lazzù a San Giulian!...

Cöse n'é de to belle stradette
monta e chinn-a fra i scheuggi do mä?
dove son quelle antighe figgette
coa sciarpetta e coa röba in scï pë
e a tressetta pendente derrë?

E l'ostaja do Parreco dove
se gh'andava a mangiä i pescisae
missi lì in t'un tondin con l'aggetto,
cornabuggia, un po d'euio, vin gianco,
pe tovaggia un pittin de pappë...

Oh che òodö de salute, che canto!...
che nietto ch'o fäva innamoa.
Fra çent'anni o duxento o trexento,
quande un borgo o saiä diventòo,
ripetian con o stesso lamento
comme là a San Giovanni de Prë,
«Chi pe tempi o l'ëa un posto d'incanto,
gh'ëa olivi e scheuggee in sce-o mä!...».

Marinetta, patella de scheuggio,
anche a ti comm'a o scheuggio Campann-a
l'angonia a t'é staeta sunnä!...

Quande freida in çittae a tramontann-a
a sciusciava pe-e stradde infuriä,
ghe vegnivimo a portopigheuggio,
perchè lì se ghe poèiva assoiggiä;
ti me fävi sentï o to cädin
comme a ciossa a l'ascada o pollin.

Ghe vegnivan artisti e poeti
a çercaghe salute e fortunn-a:
e vegnivan ben ben da lontan.
Mi t'ò visto unna sèja de lunn-a;
ëo insemme con Guido Gozzan.

Se l'é veo de antighe sirene
che incantavan chi e stava a sentï,
mentre in çë presenziava Selene,
d'ëse staeto incantòo devo dï.
...e davanti gh'avèivimo o mä...

Marinetta, patella de scheuggio,
anche a ti comm'a o scheuggio Campann-a
l'angonia a t'é staeta sunnä!...

[ Inderrê ]