Ve pòrto i salûi do Niccolin
zeneise@francobampi.it
 

Intrâ > ...e chi i âtri > Giovanni Murchio > Ve pòrto i salûi do Niccolin
[ Inderrê ]
Pagina primma ] Pagina doppo ]

Scignori, perdonnae se v'arròbo pòchi menûti do vòstro tempo.

Ve pòrto i salûi do Niccolin, o Paganini.

Scignori, no ve resätae! No vegno da l'Inferno, ma da-o Paradiso.

Ei capïo ben, scignori, o Paganini o sta pròpio lasciù, ve o pòsso ben dî mì che son staeto con lê scinn-a pòchi momenti fa.

Veddei, anche mì g'ho in man o violin, anche se son vestïo comme un repessin.

Ea vestïo coscì anche quella seja d'inverno quande, stanco, affamòu, sensa un citto in ta stacca, me son affermòu sotta a luxe giäna de 'n lampion, ho pösòu o cappello in taera, ho acciappòu l'archetto e me son misso a sûnnâ.

Sûnnâ? ...Pe moddo de dî, perché o freido, i brignoin in te moen, i zunchetti de dïe deformae da l'artrite, no me lasciavan quetâ, e e nòtte sciortivan a brettio stonae e lamentose tanto da fâ allighî e bële e o fî da schenn-a; e o cappello o restava veuo.

Poi tutt'assemme me se avvixinòu n'ombra scûa: ho issòu i euggi e ho visto ch'o l'ea un òmmo tutto vestïo de neigro, secco, co-i cavelli lunghi sotta o cappello a tûbba.

O m'ha fissòu pe duî o trei menûti, poi o m'ha dïto: "Baccan, daeme o violin!".

"Ahimemi! - ho pensòu - son ben condïo de sâ! Sto chì o me voeu arröbâ l'unico attresso che gh'o pe vive!", ma o l'aiva duî euggi coscì profondi e malincònici, che gh’o porzûo o strumento comme se fïse stranïo.

Poi o l'ha incommensòu a sûnnâ. Ma cose diggo sûnnâ! N'ho mai sentïo 'na muxica coscì! Paiva che se fïsan descadennae tutte e forse da natûa. Ean burrasche de Mazzo, furmini e saette, maoixi che se franzeivan in scî scheggi..., poi d'incanto paiva de sentî o sospïo de l'aegua fresca de 'na vivagna, a canson de un roscigneu innamuòu, o reciòcco do campanin de San Giäxo...

Son cheito in zenogge... Intanto a gente, che primma a l'allungava o passo faxendo finta de no veddime, a s'ea fermâ incantâ, e a metteiva e moen in to portafeuggio.

Quande l'ea tutto finïo, o cappello o l'ea pin de palanche.

Poi o Paganini, aviei capïo che o l'ea pròpio lê, o m'ha ridaeto o violin e se n'é anaeto sensa dî 'na parolla...

No l'ho ciù visto fin che son visciûo. No son staeto de segûo n'erbo de santitae: quande m'attrovava duî citti in ta stacca, me piaxeiva stâ in scio gòtto, e quande e cose anavan ciù mâ do sòlito, tiävo zù di sacramenti che favan scrollâ finn-a o bricco do Gazzo...

Quande ho finïo de pagâ i me puffi in Purgateujo, San Pê o m'ha portòu in scia nûvietta di muxicanti. Lì ho rivisto o Niccolin. "Benvegnûo!" o m'ha dïto "Oua ghe semmo tutti!". E insemme a-o seu grande amigo Sivori emmo formòu o Trio d'Archi "Zena in Çê" e sûnnemmo pe-e anime di Zeneixi che cian cianin ne vegnan a trovâ.

Tutti i anni a Natale anche a Sacra Famiggia a fa o Presepio. Quande seunna mëzaneutte, dòppo che i Angei han cantòu l'Alleluja, San Giöxeppe o ciàmma o Niccolin e o ghe fa sûnnâ l'Ave Maria Zeneise do meistro Dodero, e alloa o Bambin o s'addòrme beato, e a Madonna a s'illumina d'Amô.

Eppure 'na vòtta l'ho visto cianze, o Niccolin; l'é staeto o giorno che han cacciòu zù a seu casa in Gatta Moa. Oua, tutte e vòtte che se parla de Zena, ghe ven o groppo in ta göa e pe quello giorno o cianta lì de sûnnâ.

Ma quande a Zena se ricordan de lê, se gh'allarga o cheu e o me dïxe: "Ti veddi! I Zeneixi me veuan ancon ben!" e o me manda zù a portäghe i salûi.

Ben trovae, Scignori, e ricordaeve che se de neutte a-o ciaeo da lûnn-a issae i euggi pe ammiâ o çê, da-a stella ciù vixinn-a a-a Lanterna porriei sentî adäxo adäxo e nòtte do violin de Paganini.

(Giovanni Murchio)

[ Inderrê ]