POAE
zeneise@francobampi.it
 

Intrâ > ...e chi i âtri > Giovanni Murchio > POAE
[ Inderrê ]
Pagina primma ] Pagina doppo ]

T'ea cäo contâme de quande t'ei mainâ,
l'Atlantico a vint'anni in sciâ Vespucci,
passâ o Canâ de Panama co-e ciüse,
sentî o vento de mâ 'n scî teu cavelli...

Poi a guaera schifosa in te l'Egeo,
o "Fiume" ch'o l'affonda, o zëo in te òsse,
aspëtando a scialuppa ch'a te salve.

E dappeu a prexonïa, a famme, o freido,
e scòrse de patatta comme çenn-a,
e bòtte da-i Françeixi, e poi ... a päxe,
ti torni a casa secco comme un ciöo,
...manco teu moae a t'ha riconosciûo...

Pe 'n pö stava a sentî, poi me stûfava,
un'ombra a se pösava in sci teu euggi,
ti cangiävi discorso, ...o ti taxeivi.

Oua che t'e toccòu l'ûrtimo pòrto
e duî palmi de taera t'ae de d'äto,
comme vorriae sentî contâ e teu stòje,
a traversata, o mâ, a sòsta in Cile,
o pan che t'impastavi pe i mainae...

Ma solo o vento o pòrta n'eco antiga,
ch'a se perde tra e ramme di cipressi.
Pösite, Poae, che o viägio o l'é finïo,
t'aspëta in paxe o Capitan do Çê...

Giovanni Murchio

[ Inderrê ]