Stamattin han taggiòu l'erbo de fighe.
O se n'é anaeto zù sensa un lamento.
S'é fermòu finn-a o fraschezzâ do vento
pe rispetto de quelle ramme antighe.

Addio co-o cheu mae cäo e vëgio amigo,
a picòssa sta vòtta a t'ha abbattûo,
anche a mì a me tocchiä, stanni segûo,
che a mae vitta a l'é appeisa in sce 'n bäsigo.

M'é cäo pensâ che in to Giardin do Çê,
in mëzo a tutti i Angei do Segnô,
m'aspëte, a fâme ombra sott'a o sô,
'n'erbo de fighe bello drïto in pê.

Giovanni Murchio